车仔主场蜂冚圣人

猛将蓄锐 不容再失 今晚英超补赛独脚戏，「1哥」车路士主场迎战「圣人」修咸顿。车仔畀次席热刺愈追愈近，榜首地位出现危机，今仗不容再失，啱啱英足盃晋级信心返晒嚟之馀，主力夏萨特及迪亚高哥斯达只係打咗半场都冇，抖到够势必「蜂冚」修咸顿，车仔主场让1/1.5，拣上盘。 （Now 621及LeSports HK应用程式周三凌晨2时45分直播） 车仔近4仗联赛输掉2仗，依家只领先连场报捷嘅热刺4分，令联赛冠军之争再生悬念，为保榜首地位，必趁主场之利尽力抢分。 修咸顿遇强即脚软 踢波嘅嘢有起有跌，车仔日前喺英足盃4强恶斗劲敌热刺，主帅干地大胆正选收起夏萨特及迪亚高哥斯达等主力，起用韦利安、巴舒亚伊及尼敦阿基等副选，佢哋亦交到货，韦利安更省2粒，而夏萨特同「迪哥」下半场中段入替亦扭转乾坤，「夏神」仲有波入添，协助车仔赢4比2杀入决赛重拾信心，兼且可挫一挫热刺锐气。查实「夏神」同「迪哥」上仗踢咗半场都冇，干地明显係想佢哋留力打好今仗，尤其係夏萨特喺主场演出特别sharp醒，佢今季联赛有14个士哥，其中有10粒于自己地头史丹福桥球场取得，勇不可当。 另一边厢，修咸顿自2月尾失落英联盃冠军后，既冇护级压力又冇乜机会争踢欧洲赛，表现开始反覆不定，近6仗联赛只获3胜1和2负，由于续有中坚华基尔云迪积克养伤，焗用吉田麻也拍住积克史提芬斯，呢6仗合共失咗9粒，认真唔稳阵。再睇埋「圣人」近5次作客如热刺、曼联等前7球队，仅获1和4负，明显作客遇强即脚仔软，造访近12仗联赛主场赢11仗、有8仗赢2球或以上嘅车仔，凶多吉少，一于捧车仔上盘。