今晚英超圣诞新年快车压轴战，「1哥」利物浦喺主场迎战锡菲联。红军嘅晏菲路主场威力强劲，今季联赛主场赢晒，而且经常由头赢到尾，撞正啱啱被打破客场不败身嘅锡菲联，势必再做急先锋，1.58倍半场主胜有计。
（Now 621及611周五凌晨4时直播）
红军强势未止，去年尾喺卡塔尔捧走世冠盃后，回国即以4比0作客大炒「2哥」李斯特城，上轮主场再赢狼队，弗到漏油。除咗前线3叉戟穆罕默德沙拿、沙迪奥文尼及罗拔图法明奴，奇兵奥历治亦随时候命，仲有助攻力极强嘅两位翼衞阿历山大阿诺特及安德鲁罗拔臣，真係全民皆攻。
锡菲联兵少快车攰爆
另一边厢，升班球队锡菲联今季表现唔错，可惜后备力量严重不足，嚟到圣诞新年快车嘅频密赛期即显疲态，先係仅胜白礼顿、再同屈福特打和1比1，上仗作客全场死守之下，仍淨吞曼城两蛋，今季联赛作客不败身被打破之馀，体力消耗极大未回得切气，仲要造访红军坚难捱。何况利物浦嘅晏菲路主场威力强劲，今季10场主场联赛全胜，其中9仗更喺上半场领先，预计佢哋一开波会即刻抢攻，半场主胜值得捧场。
