除咗英联盃之外，今晚仲有英超补赛，「1哥」利物浦作客硬撼「锤仔帮」韦斯咸。红军虽然日前足总盃惨遭甲组仔逼和，但华基尔云迪积克等主力抖到够，今仗必定抢缰，撞正伤兵满营兼沉到爆嘅韦斯咸，随时速战速决早早奠胜，半场客胜值得捧场。
（Now 621周四凌晨3时45分直播）
利物浦于日前足总盃作客甲组仔梳士贝利，竟喺领先两粒之下被逼和2比2，各项赛事7连胜断缆，不过主帅高普嘅排阵几有心思，既有居迪斯锺斯、哈维艾利洛等新仔，亦有副选南野拓实、奥历治及阿祖安卡斯迪路，仲畀啱啱伤愈嘅法宾奴泰华利斯、洛夫云、祖尔麦迪比担正，趁机操番起状态。同时穆罕默德沙拿、罗拔图法明奴等主力去到末段先后备入替，出力唔多，其馀主力如华基尔云迪积克甚至冇份入大军名单，可养精蓄锐备战今仗，连同赛后高普话重赛照出U23嘅言论，可见对联赛同足总盃嘅重要程度，有天渊之别。
韦斯咸阵容天残地缺
韦斯咸于年头易帅，莫耶斯接手2连胜后，即迎来4场不胜（1和3负），包括日前足总盃畀英冠球队西布朗踢出局，极速打回原形。当然「莫天才」有苦自己知，睇吓「锤仔帮」嘅伤兵名单水蛇春咁长，包括法比安斯基、马苏亚古、耶莫兰高、辛迪加斯、菲腊安达臣等皆有伤在身，个阵咁天残地缺点顶红军呀？利物浦最叻先发制人，单计联赛，连续10仗均于上半场取得领先，全部都由头赢到尾，客胜太热冇肉食，转捧半场客胜好过。
