4强恶斗 PSG摩纳哥踩场大报复

法足盃4强上演重量级大战，巴黎圣日耳门（PSG）主场迎战摩纳哥；两军今季由头斗到尾，PSG早前喺法联盃决赛大胜4比1先拔头筹；摩纳哥近年作客PSG往绩佳，为报一箭之仇，就算作客亦唔会死守。双方阵中都有唔少攻击好手，喺一场过嘅淘汰赛场合，预计会同上次一样出现大手交易，3.5球大盘博得过。 （TVB 303周四凌晨3时05分直播） PSG同摩纳哥今季喺国内3大锦标由头斗到尾，联赛依家两队同分未知鹿死谁手，之前法联盃决赛PSG赢波先下一城；由于法足盃另一场准决赛由昂热斗甘冈，实力上同两大劲旅有明显分野，所以今场边队赢波，捧盃机会高唱入云，名副其实係冠军前哨战。上次法联盃决赛摩纳哥虽然惨败1比4，不过嗰场比赛法卡奥因伤未有披甲，而且经过欧联8强淘汰多蒙特，摩纳哥依家士气及信心比起上次交手有过之而无不及，特别係19岁小将基利安洛天近期愈战愈勇，近4仗比赛个人轰入4球，势成PSG防线心腹大患。连同联赛及盃赛在内，摩纳哥对上9次作客PSG只係输过1次，往绩唔失礼，凭佢哋强大火力有权以攻代守。 圣日耳门晒冷还击 当然，主队PSG嘅攻力亦唔需要怀疑，乌拉圭射手卡云尼今季喺各项赛事个人攻入44球，包括上次法联盃决赛梅开二度，早前受伤患困扰嘅德国中场达斯拿上场联赛亦后备登场，加埋迪马利亚、马度迪及马高华拉堤等好手，PSG嘅进攻火力亦唔比摩纳哥逊色。既然今场一场过决胜负，只要打破缺口，入波随时陆续有来，如果嫌中位数2.5球嘅大盘太热，不妨转捧3.5球嘅入球大。