锺情足总盃唔赦利物浦
英格兰足总盃16强最瞩目大战，由前届冠军车路士主场斗利物浦。车路士同足总盃特别有缘，近11届赛事赢过4次冠军，而且近6次主场出战英足盃赢5次。「红军」啱啱喺联赛被破不败身，而且足总盃例出小将，车路士凭主场之利应可搞掂利物浦，车仔让平半捧上盘。（周三凌晨3时45分开赛）
车路士领队林柏特喺球员时代曾4夺英足盃冠军，包括最后一次于2011/12年球季，协助「车仔」以2比1击败利物浦夺冠，对于点样应付呢项世界上历史最悠久嘅足球比赛，当然有其独特心得。车路士喺应付英足盃有理想表现，尤其主场出击更加得心应手，佢哋近6次于史丹福桥球场出击英足盃获5胜，而且全部「零封对手」，防线做到滴水不漏，即使今场对手係利物浦，相信一班「蓝战士」都冇有怕。
作客嘅利物浦日前喺英超爆冷输畀屈福特，联赛不败断缆；众所周知，佢哋今届目标係尽快捧起球会史上首个英超冠军，以及尽力衞冕欧联，本土盃赛对利物浦来说较为次要，最佳例子「红军」喺英联盃8强，由于撞正要飞去中东踢世冠盃，领队高普够胆死派出成队青年军斗维拉。而早前足总盃第3及第4圈，利物浦亦派唔少副选同青年军落场，相信今场都会见到唔少生口生面嘅「大冧巴」球员上阵。
洛夫云係防线炸弹
虽然利物浦一班青年军，包括左右二闸历高威廉斯同亚当路易斯质素係有，但经验欠奉，点都要搵个后防支柱傍住，可惜「红军」后防将会出洛夫云孭飞，呢名「大炸弹」正正喺球队0比3不敌屈福特一役孭晒镬，今场利物浦个后防真係睇到都惊，车路士唔赢对唔住自己喇！
