德国盃8强战今晚开打，焦点係史浩克04主场迎战班霸拜仁慕尼黑。史浩克近况跌至冰点，仲要伤兵成灾，连稳阵教头大衞华拿都话只能望天打卦，球队面临嘅危机随时畀质态超群嘅拜仁进一步引爆，一场大屠杀恐难避免，黑柴推介拜仁让球客胜。（香港开电视77台、有线661、601、662及602台周三凌晨3时45分直播）
史浩克自去年底开始一直行衰运，主力球员接连受伤，而且个个伤亲都大镬嘢，防线主力沙利夫辛尼同史谭保利一早已经係十字兵，近期中场最具创造力嘅苏奥沙达同卡利古尼都接连重创，上轮联赛对科隆之前，队长兼最硬淨防中马斯卡利都证实要长休，另一防线重心奥辛卡巴克，对科隆踢咗唔够30分钟亦伤出，仲伤到要送院治疗，难怪赛后大衞华拿话：「我睇到阵上球员表现唔好，但已经冇人可换，依家只有盼望班伤兵快啲好番！」
人脚不足应付两条战线
史浩克近6场联赛未赢过之馀，仲只能够喺榜尾柏达邦身上入过1球，近两仗面对莱比锡同科隆共吞8蛋，连反击能力都冇，信心接近崩溃，积分榜除被列强抛离外，下届欧战席位都岌岌可危，若然嚟紧周六对第8位嘅贺芬咸输埋，仲会畀对方爬埋头，形势恶劣，现阶段难有馀力兼顾盃赛。
相反拜仁愈战愈勇，即使王牌射手罗拔利云度夫斯基养伤，上轮联赛作客都炒贺芬咸6蛋，基于下轮联赛主场遇弱旅，跟住欧联对车仔又有明显领先优势，可以迭埋心水踢好呢场德国盃，遇上天残地缺嘅史浩克大胜可期。
