好心社工教唔掂利华古逊

周五德甲独脚戏利华古逊主场对史浩克04，两军级数相若，近季都以「挑战欧联，起码欧霸」为目标，不过今季同样失败，目前排喺十名以外，尤其利华古逊上月初搵咗「好心人」泰亚芬哥古特执教后，表现同成绩仲衰多二钱，会方目前首要工作係搵下季新帅，球员战意一般，今晚主场让唔起波，黑柴推介史浩克受让平半嘅下盘。 （Now 670、有线61及201台周六凌晨2时30分直播） 利华上月初不敌多蒙特后，怒炒获外界有好高期望嘅教练罗渣舒密特，搵泰亚芬哥古特顶上，仲讲明係试用性质，如果球队未能攞到下届欧霸盃参赛资格，佢就要季尾走人，当时黑柴已批评呢个係错误决定，因为黑柴喺德国战友Alwin Amler口中，已经知道呢个前贺芬咸U17教头功力麻麻，佢只係出名好心人，经常帮助年轻球员解决家庭问题，似社工多过教练。结果佢上任至今，利华8战仅得1胜4和3负，唯一胜仗係对已经笃定降班嘅达斯泰特，哥古特想攞欧霸参赛资格留低机会微乎其微，难怪最近连球会官网都少咗上载佢嘅讲话，摆到明等球季完结就再度换帅。 史浩克受让坐和望赢 哥古特最大问题係优柔寡断，着重控球根本唔适合利华球员擅长嘅快速踢法，而且临场调动极差，佢上任第一场联赛主场对云达不来梅，本来早早领先仲控制战局，但竟然愈搓愈后等完场，结果畀不来梅老将比沙路后备入替扳平。球队跟住全无起色，近期仲接连畀ＲＢ莱比锡同弗赖堡完场前绝杀，士气大受打击。史浩克近期成绩都曳，但喺欧霸对阿积士出局只係相当失运，次回合整体表现出色，上轮联赛面对莱比锡亦踢出拚劲逼和对手，斗志同演出都获好评，今仗面对大部分人抱收咧心态嘅利华，即使作客都有力坐和望赢。