多蒙特拜仁大驳火
2020/05/26
艾宁夏兰特
1/4
国家打吡拗手瓜
今晚德甲快车爆发国家打吡兼榜首大战，「2哥」多蒙特主场硬撼「1哥」拜仁慕尼黑。多蒙特依家落后拜仁4分，今仗赢波即拉近差距，扭转争冠形势，箭头艾宁夏兰特、杜根夏萨特及查顿辛祖个个都弗，背城借一下必定狂攻，但有射手罗拔利云度夫斯基等最强火力嘅拜仁，亦唔会坐以待毙，加上近年碰头例演大骚，3.5球嘅入球大有买趁早。（无綫85台、Now 670、有线651及611台周三凌晨零时30分直播）
多蒙特自季中签入超新星艾宁夏兰特后，战绩及火力一路狂飙，歇冬后10场联赛豪取9胜1负，艾宁夏兰特更喺呢10场联赛轰10球，脚风奇顺。虽然队长马高列奥斯仲未好番，幸好翼锋杜根夏萨特、查顿辛祖及阿舒拉夫表现出色，今季3人合共交出38次助攻，佔据德甲助攻榜前5名当中3席，其中辛祖入波加助攻合共製造30个士哥，两项都达双位数字，表现拍得住巴塞球王美斯，佢连续两仗只係后备上阵，似乎为今仗养精蓄锐。
蜜蜂兵团火力全开
睇番联赛榜形势，排名第2嘅「蜜蜂兵团」目前有57分，依家仍落后榜首嘅拜仁4分，即係话今场只要赢波，就可以同拜仁拉近至1分差距，因此多蒙特为争标呢场「6分波」许胜不许和，一定藉地利抢攻争赢波3分。
儘管拜仁今季出闸脱脚，幸好主帅汉斯弗利克喺去年11月中途接手后，17场联赛豪取14胜1和2负，包括首度领军喺主场大破多蒙特4比0。计一计呢17战拜仁合共轰55球，场均入球超过3粒，令汉斯弗利克成为德甲史上带队最快完成50球嘅教练。弗利克上任后重新起用汤马士梅拿，呢位拜仁忠臣即时咸鱼翻生，今季联赛交出17个助攻，暂居欧洲5大联赛助攻榜榜首，箭头罗拔利云度夫斯基亦係受益者，佢喺今季各项赛事取得41球，包括联赛以27粒位居德甲射手榜「1哥」，亦係佢连续5季入球达「40+」，媲美两大球王美斯及C朗。
梅拿罗拔仔着晒火
如果拜仁今场赢波，就几近粉碎「蜜蜂兵团」争标希望，向8连霸迈进一大步，预计即使作客一样照攻。翻查两军近5次碰头，合共炮製22个士哥，其中4场开4球或以上，倒戈嘅「罗拔仔」佔咗9粒，剋住旧东家，今场係斗攻格局，中位数3.5球嘅大盘乃不二之选。
