奥格斯堡半和邦到手
2020/05/27文:法达斯维
1/2
今晚德甲中下游对决，奥格斯堡主场迎战柏达邦。虽然奥堡有新帅效应，上仗赢波反弹，不过包尾嘅柏达邦喺联赛重开后连续两仗打和，状态唔曳，呢班波客场出击初段例必死守，经常开半场和，不妨追多次。
（myTV SUPER周四凌晨2时30分直播）
奥堡新帅靴列治之前因违反隔离令出去买牙膏，搞到联赛重开首仗对禾夫斯堡被罚停赛，球队亦因此输埋，直到上仗正式督师，作客史浩克04即豪赠3蛋，赛后喺社交平台仲寸爆史浩克04要改名做03，认真牙擦。
以波论波，奥堡上仗靠罚球早早开纪录，中后段再趁对手压前时两度反击得手，战术无疑成功，但更大原因係史浩克状态太曳，重开后两连败狂吞7蛋，咪因为大胜一场而将奥堡睇得太高。
柏达邦放开怀抱有好转
老实讲柏达邦喺德甲确係唔够班，长期排包尾，未计今轮，依家落后尾3嘅杜塞尔多夫6分，就算想争踢护级附加赛亦唔易。但冇乜包袱下，柏达邦近期表现反而有好转，重开两轮接连打和杜塞尔多夫及贺芬咸，令人喜出望外。况且佢哋有自知之明，尤其係作客初段定必死守，近7仗联赛作客6次开半场和，包括造访榜首拜仁半场都顶得住唔输，今仗半场和值得再追。
