水原质优恰到仁
2020/05/23文:Mic少
主场遇弱係时候开斋
韩职将于周六上演3场比赛，包括水原蓝翼主场对仁川联，双方今季开咧后踢咗两场，同样仲未赢波，但要留意水原蓝翼呢两场对手係上季冠、亚军全北汽车同蔚山现代，虽败不辱，今场斗实力次一级嘅仁川联，正係打开胜利之门嘅好机会，势必大举进攻，首选主胜。
（无綫myTV SUPER周六下午3时30分直播）
水原头两场联赛遇上劲旅全北汽车及蔚山现代，同样力拚至最后阶段先至失守，表现绝对有交代。特别係上场硬撼蔚山，更加一度领先2球，但临尾因为门将卢东件犯错导致输波，实在唔抵，相信今场会打醒十二分精神。
水原锋线好高质素，新加盟嘅波斯尼亚前锋苏利文卡碧上场轰入加盟后首个士哥，信心已有明显改善。上季神射手阿当泰加特上场仅后备上阵，今场伤愈应会担正，就算洪喆、廉基勳未必出得，一样秤先。加上佢哋上场输得冤枉，今场争胜斗心肯定更加强。
仁川联作客往绩蚀章
另一边厢，仁川联头两场联赛同以0比0闷和FC大邱及FC城南，贯彻以往保守作风，呢种踢法往往令球队陷入被动，尤其係今场作客势必捱打。翻查仁川联近5次作客水原蓝翼，就输咗4次，总共失咗14球，可见仁川联「稳健防守」遇上水原蓝翼，就变成中门大开，预料今场难逃一败。
