沙贝鲁根细抗利华
2020/06/09文:■ 法达斯维 ■
沙贝鲁根中场真尼基
1/3
遇强死守耍家
今晚德盃爆发4强战，沙贝鲁根主场越级挑战德甲「5哥」利华古逊。沙贝鲁根喺今届德盃屡创奇迹，遇强有晒死守准备，利华啱啱喺联赛激战输畀拜仁未回气，超新星夏维斯又有伤上阵成疑，加上近届喺德盃对非德甲球队多数少交收，中位数3.5球嘅入球细值捧。（香港开电视77台、有线661及601台周三凌晨2时45分直播）
沙贝鲁根只係德国南部联赛球队，级别上仲低过德丙，不过佢哋喺今届德盃展开神奇之旅，法定时间4战取得2胜2和，曾淘汰两支德甲球队科隆同杜塞尔多夫，认真唔讲得笑。其中近两圈对住卡尔斯鲁厄及杜塞尔多夫，法定时间打和0比0及1比1，最终捱到互射12码踢对手出局，睇得出呢支弱旅几有自知之明，遇强必定採取守字诀，今仗一定再嚟呢招。
利华质素梗係高好多，难得今圈遇弱，绝对係杀入决赛嘅大好良机。不过利华史上只曾3次进身德盃决赛，仲仅得1993年封王，踢盃赛唔算相当耍家，今仗就算遇弱亦会小心为上。
夏维斯有伤未必踢
今季最大目标係下届欧联入场券嘅利华，日前喺联赛关键战先同拜仁激斗，仲倒输2比4，众将都搏得好尽，匆匆再战体力未回复，最弊係超新星夏维斯上仗已经因伤倦勤，今仗未知能否赶及披甲，冇咗呢位士哥频频嘅射手，攻力必定受削。
翻查纪录，利华近8次喺德盃对住非德甲球队，法定时间有6次开3球或以下，今仗战情随时陷入胶着状态，预计利华顶多小胜，客W冇肉食，转捧中位数3.5球嘅入球细好过。
