蔚山撼城南「最佳」之战
2020/06/11
韩职星期六有场前列大战，由蔚山现代主场迎战FC城南，两队波日前包办晒韩职5月份最佳球员同教练，呢场「最佳」大战当然够晒睇头。
（周六下午3时30分开赛）
蔚山现代今季联赛仲未输过，早前连和两场陷入小低潮后，上轮重振雄风，作客4比0大炒浦项制铁，巴西射手祖利亚尼加奥又有入波，开锣5场波劲轰第6球，获选为韩职5月份最佳球员实至名归，尤其上场入两粒嘅李青龙受伤患困扰，祖利亚尼加奥嘅发挥就更加重要，不过以蔚山现代今季5战入13球嘅超强火力，相信要入波难唔到佢哋。
城南借用罗相浩
FC城南目前排第4位，上场意外输畀FC大邱先至被打破不败身，主帅金南一就获选为韩职5月最佳教练。事实上城南本身属于守强于攻嘅球队，今季只失3球同榜首全北汽车睇齐，但为咗加强入球能力，日前宣布向日职球会FC东京借用前锋罗相浩，呢位23岁新星之前踢FC光州，2018年喺K2出场31次入16球，入球能力有保证。城南锐意加强进攻能力，今场作客蔚山现代或会一改作风踢得进取，入球大值得留意。
