复赛首战拉科喜遇私房菜
2020/06/11
除西甲外，西乙亦喺今个周末返嚟，周日晚有场拉科鲁尼亚主场对希杭。希杭排名远高于拉科，但佢哋每逢作客例必脚软，拉科要抢分护级一定搏尽，主场出击遇上「私房菜」，值得秤先。
（周日晚11时开赛）
希杭作客打折扣
希杭依家排第8位，落后「6哥」艾尔切5分，虽然联赛仲有成11轮，争取升班附加赛资格未绝望，但呢支由前拉科及华伦西亚名宿杜杰执教嘅球队，向来靠主场搵食，客场表现大打折扣。翻查纪录，希杭今季15场联赛作客，只得3胜4和8负，喺西乙客场榜只排尾5，真係曳到冇朋友。
佔主场之利嘅老牌球会拉科现正沉沦至尾4，好在同「安全线」尾5嘅阿尔巴塞特同分，护级仲有希望。儘管有安尼高保维达、穆查沙迪克未好番，中场域陀莫尼祖亦要坐波监，不过佢哋摆脱开季头20轮赢得1仗嘅颓势，停摆前11轮取得7胜2和2负，包括一波7连捷，尽显护级决心。其中日本国脚柴崎岳，喺拉科上年年尾改由费兰度华斯基斯回归接手后，上阵机会渐多，成为球队从谷底反弹嘅原因之一，不过佢喺抗疫期间日日留喺屋企陪住索爆女星老婆真野惠里菜，真係有啲担心佢脚仔软。双方近5次交锋，拉科录得4胜1和未输过，明显食住希杭。
