西维尔主场剋迪
2020/06/11文:法达斯维
西维尔中场奥甘波斯
1/4
西甲重开即爆最激打吡
停摆3个月嘅西甲今晚重开，即爆发最激塞维利亚打吡，由「3哥」西维尔主场火併死敌贝迪斯。虽然两军每逢打吡战例搏甩髀，不过西维尔今季战绩远胜死敌之馀，近年主场出击亦剋死贝迪斯，为保住前4夺取下届欧联入场券，斗心肯定十足，有力喺重开首仗打响头炮，主胜值得捧场。
（Now 632周五凌晨4时直播）
同其他同市死敌一样，西维尔与贝迪斯牙齿印甚深，佢哋都视联赛两循环碰头嘅打吡战，係全季最重要嘅两场赛事，因此每次交手都踢到飞沙劈石。但讲到今季整体演出，西维尔更加平稳，依家以47分做紧「3哥」，甩开第12位嘅贝迪斯多达14分，单係停摆前4场联赛，就取得2胜2和，包括勇挫基达菲及逼和马德里体育会。
近5次地头斗贝迪斯4胜
虽然西维尔今仗有中场尼曼查古迪积停赛，不过队中主力奥甘波斯愈踢愈好，联赛已入10球，係今季西甲入球最多嘅中场，停摆前6场联赛就入咗5粒兼交出1次助攻，实力有番咁上下，加上主帅洛佩特吉亦获球队续约3年，令士气大振，主场出击更加可以睇高一线。
贝迪斯係出晒名嘅西甲神经刀，今季两战皇家马德里录1胜1和未输过，不过面对伊巴、CF格兰纳达、艾拉维斯及雷加利斯等弱旅都失分收场，翼锋费基亚表现时好时坏，仲要靠38岁老将祖亚昆神来之笔打救球队，停摆前7仗联赛赢得1场，相当飘忽，难怪徘徊喺联赛榜中游。
儘管西维尔位居第3位，不过只係领先「5哥」基达菲、「6哥」马体会1分及2分，稍一不慎随时跌出前4，为保下届欧联入场券必搏尽，何况近5次主场出战打吡录得4胜1负，摆明格食格，主胜有计。
