今晚国际赛一众强队统统休息，波友亦不妨抖抖为听日连场大战储定弹药先。若然想过吓手瘾，不妨考虑北爱尔兰主场斗斯洛文尼亚，双方同样唔係以攻力见称，1.53倍入球细可以一试。
（TVB302周二凌晨2:45直播）
北爱尔兰喺今届欧国盃外围赛予人惊喜，喺F组力压罗马尼亚、匈牙利以首名出线，最近亦录得连续9仗不败成绩，状态的确唔错，不过呢班波嘅火力始终嫌弱不宜高估。佢哋近3仗斗威尔斯、拉脱维亚同芬兰，合共入得3粒。加上国家队首席射手拉菲迪，就连踢英超护级球队诺域治都唔够班，早前被球队送咗去英冠球队伯明翰，对佢嘅信心不无打击。
斯洛文尼亚随时hea踢
至于对手斯洛文尼亚，就喺欧国盃附加赛中被乌克兰淘汰出局，成班球员唔使特别搏表现，今仗战意成疑，随时hea踢都唔奇。睇番佢哋5场比赛入面，对住马其顿、圣马力诺同立陶宛呢班欧洲知名鱼腩球队，夹埋都只係入得5球，就知班波嘅火力属有限公司。难怪双方自08年交手以嚟，连续4次对碰从未出现过多过2个入球，并唔係冇原因囉。
