形勢唔急 睇定嚟踢
世盃C組最後一輪賽事，2支歐洲代表丹麥、法國正面對撼。丹麥只要多取一分便肯定以次名出線，法國和波亦可穩奪首名，所以今場和波賠率賽前已急跌至2.3倍，不過波童對於會否再次出現2004年歐國盃丹麥、瑞典「疑似默契波」有保留。丹麥近6場國際賽全開半場和，對住有機會收起部分正選嘅法國，大可繼續睇定嚟踢，博半場和更穩陣。
（Now 616及618周二晚10時直播）
要數近年最經典「疑似默契波」，一定係2004年歐國盃分組賽，當年丹麥、瑞典於最後一輪分組賽打和2比2，以對賽較多入波「合力」踢走意大利，今次主角又係丹麥。丹麥現時以3分領先澳洲，今場和波就唔使理會另一邊廂澳洲對秘魯賽果，肯定以小組次名晉級，2戰全勝手執6分嘅法國，今場只要唔輸亦可以首名出線，所以今場和波賠率，已由原本最初開售時嘅3.15倍急跌至2.3倍。
丹麥鋒將停賽先求穩
不過波童對兩隊會否喺眾目睽睽之下，再次合力「炮製」和波戰果始終有保留，何況對丹麥嚟講，如果澳洲喺同時間開波嘅比賽贏唔到秘魯，佢哋其實輸波都可以晉級，既然今場有主力鋒將尤素夫保臣累積2面黃牌停賽，進攻力打折扣，相信丹麥會一如過去比賽一樣，初段穩打穩紮為主，留待換邊後先發力。
法國隨時留力淘汰賽
法國頭2場分組賽皆以1球差距擊敗對手，表現未算太標青，特別係「3基」基沙文、基奧特及基利安麥巴比仲未好好融合，經常出現各自為戰，進攻有待改進。而且為留力應付淘汰賽，有黃牌在身嘅保羅普巴、馬度迪及哥倫天杜利素今場都有可能被收起，喺作出輪換嘅情況下，法國想喺初段攞到甜頭亦唔容易，今場半場和賠率雖然只得1.63倍同樣偏熱，但比起直接取和應更加穩陣。
