拒做四零部隊秘魯唔會縮
周二晚上C組最後一輪，澳洲同秘魯會喺索契菲施特奧林匹克球場正面交鋒。「袋鼠軍團」想出線除咗要寄望丹麥喺另一場輸波外，自己都要爭氣數爆秘魯。另邊廂已出局嘅秘魯為免做「四零部隊」，今仗都會努力搶士哥，中位數2.5球嘅入球大咪走寶！
（Now 617及619周二晚10時直播）
卡希爾有望正選救國
澳洲上仗逼和丹麥搶番1分，雖然保住出線希望，不過暫時排第3嘅「袋鼠軍團」，晉級形勢十分被動，皆因呢場面對秘魯佢哋除咗要爭取大勝外，仲要睇埋另一場丹麥對法國嘅賽果。不過與其寄望對手失分，不如自己加多兩錢肉緊踢好啲，由於前鋒納博特受傷，老牌射手卡希爾好大機會喺呢場生死戰正選披甲。卡希爾過去3屆決賽周上陣都有收穫，仲係澳洲國家隊「士哥王」，入波能力有番咁上下，加上有弗爆前鋒馬菲歷基為佢輸送彈藥，呢位38歲老將隨時再做救世主。
已篤定出局嘅秘魯，其實過去兩場踢得唔差，尤其前場以進攻核心基斯甸古華為首嘅攻擊組合，多次創造出具威脅嘅攻勢，可惜運氣欠佳，現時落得「零勝零和零分零入球」嘅田地，不過睇得出球隊進攻質素絕對唔差，尤其秘魯已闊別決賽周36年，今屆難得重返世盃大舞台，唔會甘於空手而回做「四零部隊」，隨時同澳洲駁火，中位數2.5球嘅大盤有買趁早。
