和都首名話明派副選
D組尾輪分組賽，周三凌晨喺羅斯托夫球場上演冰島對克羅地亞。克羅地亞兩戰全勝後，已經搶得16強入場券，呢場只要打和都可以保住首名，相反冰島想晉級唔贏唔得，不過佢哋攻力麻麻，就算面對好大機會以副選迎戰嘅克羅地亞，都未必入到波，中位數2.5球入球細，係不二之選。
（Now 617及619周三凌晨2時直播）
克羅地亞今屆分組賽至今表現十分對辦，繼首戰2比0擊敗尼日利亞之後，上場面對上屆亞軍阿根廷，仲以3比0大勝對手，氣勢逼人，更厲害嘅係佢哋踢完兩場未失過一球，後防夠穩陣，現時攞夠6分，已經確保出線資格。
冰島進攻板斧欠奉
賽前克羅地亞領隊達歷就講到明，呢場會派副選上陣，畀莫迪歷同洛夫雲等一班老將可以抖抖。不過佢哋後備席都仲有唔少高質球員用得，好似高華錫上仗後備上陣，就助攻畀拿傑迪錫埋齋，實力有保證。由於「格仔軍團」呢場只要守和就可以力保首名，加上佢哋有中場大將波索域坐波監，相信都唔會踢得太進取，穩打穩紮好過。
反觀冰島雖然首戰逼和過阿根廷，不過整體質素欠奉嘅問題，就喺第2場輸畀尼日利亞一役表露無遺，尤其球隊進攻板斧真係唔算多，前場球員搵食套路單調，只靠基菲爾施古臣孤軍作戰，好難有前途，尤其呢場要力爭3分嘅情況下，冰島要焗攻，反而會陷入進退失據嘅慘況，特別係面對控球能力不俗嘅克羅地亞，就算畀冰島球員偷到雞，都好難有大比數出現，加上佢哋近4仗面對克羅地亞，都只係入得1球，兼全開2球或以下，呢場中位數2.5球入球細值博。
