東歐太極王遇擅守十字軍
今晚另一場世盃E組次輪賽事，由塞爾維亞硬撼瑞士。塞爾維亞首仗旗開得勝，今仗一定穩打穩紮，呢班波防守大過天，早已失去前南斯拉夫嗰種「歐洲巴西」嘅風格，面對「同道中人」嘅瑞士，大家先求穩陣鬥「耍太極」，半場和更值博。
（Now 616及618周六凌晨2時直播）
塞爾維亞雖然係由前南斯拉夫分裂出嚟，但呢支由高拉洛夫、伊雲洛域、尼曼查馬迪、米利禾積域等悍將為重心嘅球隊，防守大過天，完全冇晒前南斯拉夫嗰種「歐洲巴西」嘅秀麗進攻，今屆首仗面對哥斯達黎加，喺全場略為佔優下，只靠老將高拉洛夫嘅招牌罰球，才打破僵局贏1比0，悶到發慌。由於眾將均集中做防守，搞到單箭頭阿歷山大米祖域經常冇波到腳，孤掌難鳴，難怪攻力咁疲弱喇。
瑞士近7仗僅失2球
另一邊廂，「十字軍」瑞士首仗落後之下逼和巴西1比1，甚有防守紀律，中前場無論係梳頓沙基利、迪斯馬利、施費洛域，都會勤於做搶截及回防助守，下季加盟阿仙奴嘅右閘列治史迪拿，上仗更將「森巴球王」尼馬盯到一戙都冇，連熱身賽在內，瑞士近7仗只係失咗2粒咁大把，真係密不透風。不過針無兩頭利，擅守嘅「十字軍」火力麻麻，尤其係面對同級對手，反而老鼠拉龜冇碇埋手，近5次面對歐洲球隊僅入3球，有辦你睇。
現時塞爾維亞以3分排E組榜首，領先巴西及瑞士2分，今仗一定穩打穩紮，佢哋近8仗有6次開半場和，預計兩支「同道中人」初段都係鬥玩拉布，半場和值得再追。
