西班牙球星留力联赛
上仗作客同意大利打和1:1嘅西班牙，今晚又要飞去东欧，同罗马尼亚踢热身赛。从牌面上睇，「狂牛军团」实力难免被人睇高一线，之不过佢哋阵中一班星级球员仲要为球会季尾赛事冲刺，加上「西班牙国家打吡」举行在即，怕且班球员都会留有一手。考虑到罗马尼亚防守力唔曳，连续8场比赛半场未曾失守，相信呢铺有力顶住半场不败，2.05倍半场和唔怕追。
（TVB302周一凌晨2:45直播）
无可否认，西班牙状态係唔差，连续7场比赛不败之馀，兼未试过喺上半场畀对手射入。咁係因为同佢哋採用控球至上嘅踢法有关，对方连想抢个波都难，更唔好话要威胁佢哋大门。但值得留意嘅係，「狂牛军团」阵中有唔少效力欧洲豪门嘅球员，嚟到季尾搏杀期，佢哋仲会唔会为咗呢啲太公波搏命先？
罗马尼亚成年未试过半场失波
咪忘记巴塞主场恶战皇马嘅「西班牙国家打吡」，将于嚟紧呢轮西甲举行，紧随其后就连马体会在内，西甲3雄又话要备战欧联8强赛事，计落呢3队球员喺今场无关痛痒嘅比赛度留一手，都係人之常情啫。
更何况就算西班牙强攻，想攻破罗马尼亚大门都唔易囉。事关呢支东欧球队喺今届欧国盃外围赛F组，10仗夹埋只係失得2球，係外围赛中失球最少嘅队伍，防守力係有保证。再睇埋班波最近表现，佢哋近8场热身赛不但试过同意大利不分胜负。更夸张嘅係，班波对上1年嗰8场比赛，从未试过喺换边前失波！呢铺佢哋对住名气、实力都喺自己之上嘅「狂牛军团」，只会更专心做好防守。以罗马尼亚呢排咁理想嘅表现，西班牙就算想入波怕且都要等到下半场先有机咯。
