「維京戰吼」震懾人心
世盃D組第2輪賽事，上仗逼和阿根廷贏盡掌聲嘅冰島再度登場，對手係非洲代表「超霸鷹」尼日利亞。兩軍踢法各走極端，冰島以出色整體戰為球迷帶來驚喜，激起全隊維京戰吼，震懾人心。相反尼日利亞踢法雜亂無章，各自為戰非常趕客。連同首仗分組賽不敵克羅地亞，「超霸鷹」近5仗輸4場，平手盤波童捧冰島。
（Now 616及618台周五晚上11時直播）
首次出戰世盃決賽周嘅冰島，上場處子騷面對兩屆冠軍、兼有球王美斯坐鎮嘅阿根廷，表現完全冇懼色，憑着出色嘅穩守突擊戰術，加上「導演」門將荷杜臣勇救12碼，半爆冷以1比1逼和阿根廷，搶得史上第1分，將士氣推上最高點。前鋒艾費特芬保加臣取得士哥信心大增，再配合基菲爾施古臣攻堅，入球能力有保證；雖然效力般尼嘅右中場貝治古蒙臣據報拉傷肌肉肯定缺陣，不過冰島最成功係整體戰，就算有一、兩名球員受傷對發揮影響不大，反而今日氣溫可能高達35度，先至令佢哋有啲擔心。
尼日利亞有域陀摩西斯、伊禾比、尼迪迪及伊恩拿祖等英超兵助陣，加上有前車路士中場約翰米基爾，人腳本來唔錯，可惜佢哋改善唔到非洲球隊慣常出現各自為戰嘅毛病，首仗0比2不敵克羅地亞，先係中場伊迪保擺烏龍，另一球犯規輸12碼，前線全場只有2次中框埋門，無論攻守表現均差強人意。
尼日利亞冇Team Work
加埋之前進行嘅4場熱身賽，「超霸鷹」近5仗只得1和4負，可見問題非一朝一夕，以目前尼日利亞狀態，面對士氣、狀態皆處勇態嘅冰島自然被比下去。何況，尼日利亞自從94、98年連續兩屆殺入16強之後，近年出戰世盃都係陪跑居多，近3次亮相決賽周9場分組賽只贏過1場，今場平手盤必揀冰島。
