英格兰大有揸拿
今晚世盃头场上演G组第二轮分组赛，英格兰对世盃新丁巴拿马。经过首轮分组赛后，巴拿马公认为今届鱼腩之一，球员年纪偏大，防线不稳吓吓要靠超技术阻截对手，上场惨吞比利时3蛋已经算少，今匀对住平均年龄第二细嘅英格兰，正所谓拳怕少壮，乐比预期英格兰可轻鬆过关，建议捧中位数2.5球嘅1.77倍大盘。
（ViuTV99、Now 616及618周日晚8时直播）
巴拿马系32支决赛周球队中，平均年龄最大嘅一队，达29.6岁，阵中有6位球员拥有过百顶急帽，虽然之后阿拔图昆特路因伤选出，补选嘅阿维拿令平均年龄稍降，但从首仗睇嚟，一班后卫实在靠唔住，成日甩位搞到频频犯规领左5张黄牌，只输比利时3粒真系大话夹好彩。
武器众多 对手难防
英格兰今届重用新人，首战对突尼西亚表现唔错，可能阵中冇乜大牌球星关系，踢来冇乜压力，以快速打法狂轰对手，初段攻势水银泻地，梅开二度嘅哈利卡尼亦尽显超强把握力，今场又系开餐时。据英国传媒报道，上场频频失机嘅史达宁及刚岩复操嘅伤兵迪利阿里今仗会退居后备，由拉舒福特及罗夫度斯卓克担正，英格兰依家可用之材甚多，除哈利卡尼外冇乜边位系必然正选，占美华迪同韦碧克都未有机会落场，咁多武器对手真系防不胜防。
巴拿马失波易崩溃
不过「三狮兵团」今场让到球半、两球略嫌过辣，既然要3粒先开得晒个上盘，倒不如博2.5球大盘好过，毕竟英格兰防线未算好稳，上场对突尼西亚都失左球12码，今届世盃实施VAR后多左好多补判嘅12码，对买大盘嘅朋友嚟讲系好事，加上巴拿马失波后易崩溃，上仗3个入球出现喺22分钟内，今场英军只要尽快入波，陷出局边缘嘅巴拿马焗搏下，入波必定陆续有嚟，到时「识巴拿马总统」都救唔番！
