宾尼迪斯急泊大巴
贵为英超老牌球队之一，纽卡素今季长期喺降班区域打滚，最终管理层痛定思痛，上周五决定辞退领队麦卡伦，搵嚟战术大师宾尼迪斯执教。肥宾出名踢防守足球，呢次作客榜首李斯特城边会斗攻咁蚀底，实行泊大巴尽力抢分止血。以「狐狸」疲弱嘅主场火力，想咬多「喜鹊」两啖唔容易，2.02倍入球细值得一试。
（now621台周二凌晨4:00直播）
沉沦咗大半季嘅纽卡素，终于决定改任宾尼迪斯执教鞭，务求喺最后关头发力逃出生天保住英超席位。名宿舒利亚就大讚呢个决定，认为有肥宾帮手令「喜鹊」护级机会大增：「如果球队一直唔变，我唔认为可以护到级，但宾尼迪斯嚟到就畀咗球队一大机会。」佢仲话纽迷一定会欢迎呢位新帅添。
讲真吖，以履历计宾帅真係唔差得去边，过去执教英超就帮过利物浦、车路士夺得欧联、欧霸盃冠军，凭佢丰富经验有力带领纽卡素回上正轨。何况过去几季「喜鹊」无论排名最终如何，防守都係联赛最差嗰几队，呢次搵以防反战术见称嘅宾帅执教，可预期队波嘅防守会有改善。但考虑到宾帅只係上任几日，执得防守未必顾得掂进攻，以呢班波对上20场英超作客食13场白果纪录嚟睇，唔排除宾帅直接泊大巴，尽力减少失球机会。
李城主场火力逊作客
随住曼城前日作客诺域治失分自毁长城，李斯特城梗係最开心，呢铺迎战纽卡素自不然想再下一城。之不过「李城」同样至叻踢防反，结果主场嘅入球数字反而比作客低。连盃赛在内，「狐狸」近7次主场出击，竟然只係入得8粒，仲有3场要食白果添。一对士哥拿占美华迪同马列斯亦冇季初咁sharp醒，近4铺只係各入1粒，火力不宜高估，加上「喜鹊」亦要搏命抢分，「狐狸」呢铺开大餐机会唔慌高。
