咬人苏复出即爆巴塞内讧
听朝继续有南美劲旅陪大家食早餐，巴西喺南美洲区世盃外围赛主场迎战乌拉圭，焦点落喺同效力巴塞、各自喺国家队孭飞嘅尼马同苏亚雷斯身上，今场係「咬人苏」刑满复出后首场国际赛，呢两位老友赛前用汉堡包赌输赢，肯定会对攻抢3分，撑1.8倍入球大。
（开赛时间：周六早上8:45）
尼马省多2粒 国家队入波追平薛高
虽然尼马係巴塞「MSN」入面，攞到最少联赛入球嗰位，咁係因为佢喺球会角色以支援为主。但返到国家队就唔同讲法，所有战术都围绕「新比利」嚟踢，务求畀最大自由度佢冲锋陷阵，所以尼马24岁仔，已经以46个国家队「士哥」，排喺名将辈出嘅巴西队射手榜第5位，只落后第4位嘅薛高2粒，相信佢都好想喺呢次国际赛档期数胡爬头。
係，「森巴兵团」今届外围赛4战2胜1和1负，成绩未算标青，但当中失分嗰2场分别係作客硬撼智利同阿根廷，输都情有可原。好在巴西主场锋力唔错，早前分别以3:1、3:0打败委内瑞拉同秘鲁。
客军防线冇卡士
讲真吖，除咗王牌射手尼马，巴西仲有杜格拉斯哥斯达、韦利安等锋将，火力其实好有保证。不过防线冇咗堤亚高施华，继续由劲唔稳阵嘅大衞雷斯同今季畀马体会放弃嘅祖奥米兰达镇守中路，话唔担心就假囉！
今仗係乌拉圭射手苏亚雷斯超过一年半以嚟，首度复出为国家队披甲。呢位前锋上届世盃咬意大利守将基亚连尼，畀国际足协重罚佢停赛9场国际赛，点会唔饿波吖，何况今场对「阿苏」意义重大，因为同佢情同父子嘅国家队军医禾达费拉拿去年因病辞世，「哨牙苏」讲明禾达费拉拿係佢生命中好重要嘅人，会为佢全力争胜喎！
之但係乌拉圭后防唔齐章，后衞高甸、荷西基文尼斯打柴，另一守将彭利拿要坐波监，随时令曼联小将古利姆华利拿攞到首顶喼帽。以佢嘅经验同火候，点旨意佢守得住尼马呢班星级球员先？既然两边同样攻强过守，一场入球骚应该都走唔甩咯。
